Na swojej swojej hłownej zhromadźiznje 21. januara 2025 w awli šule w Pančicach-Kukowje zhladowaše předsydstwo chóra “Lipa” na minjene lěto a informowaše sobustawow wo předewzaćach w nowym lěće.
Kónc lěta měješe towarstwo 71 čłonow, wot toho 57 aktiwnych spěwarjow, kotrychž nawjeduje Jadwiga Kaulfürstowa. Beno Waurich z Jawory bu jako předsyda znowa woleny. Wón wukonja tute čestnohamtske
zastojnstwo mjeztym štyri lět. Předsydstwo podźakowa so pola Damiana Dyrlicha za swoje swěrne dźěło jako zapisowar. Wón hižo njekandidowaše. Jako naslědnica bu Madlen Domašcyna wolena. Dale su so tež městopředsydce Katka Baierowa a Melanie Bulankowa kaž tež pokładnik Uwe Pjetaš znowa wolili.

Katka Baierowa a Melanie Bulankowa gratulowaštej Pětrej Korjeńkej, kotryž zhladuje na 50-lětne čłonstwo, a Monice Warichowej, kotrž je mjeztym 45 lět čłonka čělesa.

Wustupiła je Lipa na dohromady sydom zjawnych koncertach. Mjez druhim wožiwi chór po wjacorych lětach přestawki format “Lipa@přećeljo” w aprylu w Haslowje, witachu w meji na klóšterskej zahrodźe na nalětni
koncert, wustupichu w septembrje na minifestivalu we Łužiskim seminarje w Praze, prosychu na nazymski koncert do Salowa a zakónčichu chórowe lěto z beneficnym hodownym koncertom w Róžeńčan putniskej cyrkwi. Na tutym nahromadźichu so 2.150 eurow, kotrež chór w přichodnych tydźenjach dźěćacemu hospicej w Zhorjelcu přepoda. Wšitke koncerty lěta 2024 běchu derje wopytane. Naspomnjenja hódne je tež, zo bu “Lipa” jako chór tydźenja w awgusće w sćelaku “Deutschlandfunk Kultur” předstajeny.

Někotre wokomiki koncerta “Lipa@přećeljo” w aprylu 2024, hlej rubrika „Wobrazy a impresije“