Na swojej hłownej zhromadźiznje (13. januara 2026) w awli šule w Pančicach-Kukowje zhladowaše předsydstwo chóra „Lipa“ na minjene lěto a informowaše sobustawow wo předewzaćach za nowe lěto.

Kónc lěta 2025 měješe towarstwo 84 čłonow, wot toho 60 aktiwnych spěwarjow (20 sopranow, 15 altow, 12 tenorow, 12 basow a dirigentka). Předsyda „Lipy“ Beno Wawrich předstaji w mjenje předsydstwa – jemu słušeja hišće městopředsydka Katka Baierowa, pokładnik Uwe Pjetaš, zapisowarka Madlen Domašcyna a Melanie Bulankowa – wěcnu rozprawu wo lěće połnym aktiwitow: 2025 předstaji chór „Lipa“ pod nawodom Jadwigi Kaulfürstoweje zjawnosći cyłkownje 74 wšelakich spěwow, z toho wosom nowych.

Wustupiła je „Lipa“ dohromady sydom razow, při čimž móžeše so kóždy króć nad bohatym publikumom wjeselić. Nimo woblubowanych koncertow w nalěću, nazymje a po hodźoch spěwaše na swjatočnych kemšach a swjedźenskim přećahu składnostnje 800-lětneho jubileja Chrósćic. Pozdatnje cyle spontanje wobrubi tež wernisažu wustajeńcy wobrazow Maria Ošiki. Za předstajenje pasionskeje hry „Sćěhuj mje“, tohorunja w Chrósćicach, je chór tři nowe twórby nazwučował a nahrał. Dalša nowostka bě zjawna proba „Lipy“ w Pančičan-Kukowskej nowej komunikaciskej arenje.

Dorostowe dźěło towarstwa dócpě 2025 nowy wobjim. Prěni raz wustupichu „Lipki“ dwójce wob lěto zhromadnje z „Lipu“: nic jenož na nalětnim koncerće w Pančicach-Kukowje, ale tež na nazymskim koncerće, lětsa w Ćisku. Dwaj spěwaj su „Lipki“ nahrali. Samo Serbski rozhłós MDR jej mjeztym wusyła. K tomu su z wjele wjeselom swojej prěnjej hudźbnej wideji naprodukowali, kotrejž stej na youtube-kanalu „Serbska hudźba // Sorbian Music“ kóždemu přistupnej.

Dobrej zhromadnosći ćělesa njesłuži jenož bjesada kóždu wutoru po probje, ale tež Lipjanske swójbne wulěty (w septembrje po stopach sydom serbskich kralow pod Lubinom we Łužiskich horach), třidnjowske chórowe lěhwo (w Jaworniku), nowolětnička (minjeny pjatk we Wotrowje) a dalše zeńdźenja.

Wo přichodnych terminach wustupow informujemy sčasom tu w rubrice terminy a nowostki. Tuchwilu zwučujemy za zhromadne předstajenja Kocoroweho/Zejlerjoweho oratorija „Nalěćo“ z hudźbnikami Serbskeho ludoweho ansambla a chórami „Meja“, „Łužyca“ a „Budyšin“ w aprylu 2026 w Budyšinje, Drježdźanach a w Choćebuzu. Tradicionelny nalětni koncert na klóšterskej zahrodźe budźe lětsa 31. meje. (MD)