Prjedy hač so w jubilejnym lěće 2017 zaso spěwa, buchu čłonojo chóra Lipa na hłownu wólbnu zhromadźiznu prošeni. Tam rozprawješe předsydka Franciska Zopic po witanju přitomnych wo lońšim lěće.

Lipjenjo mějachu w poslednim lěće dohromady 15 wustupow. Po „Lipa a přećeljo“  sćěhowachu wustupaj z druhimi chórami k 25. róčnicy znowazałoženja ZSSt a wězo wulkoprojekt „Serbski rekwiem“, kotryž hromadźe ze solistami a Drježdźanskim orchestrom „Sinfonietta“ pod nawodom Judith Kubicec w Chrósćicach zanjesechu. Dale móžachu Lipjenjo tež loni tójšto připosłucharjow na nalětnim koncerće na zahrodźe klóštra Marijineje hwězdy a na tradicionelnym hodownym nyšporje w Róžeńće witać.

Wokomiknje ma chór 55 aktiwnych spěwarjow a spěwarkow.

Po wěcnej a financnej rozprawje woli so nowe předsydstwo. Čłonojo wuprajichu swojim starym předsydstwu Francisce Zopic, Melanie Bulankowej, Uwe Pjetašej a Benej Waurichej na dalšej lěće swoju dowěru. Přiwšěm zwołachu nowu spěwarku, Boženu Bětnarjowu, do předsydstwa.

Chór Lipa woswjeći lětsa swoje 110. wobstaće. Wjeselić móžemy so na přikład na nalětni koncert 21. meje na zahrodźe klóštra w Pančicach-Kukowje, na nowostku, nócny koncert 26. awgusta na Kukowskim hrodźišću, na nazymski koncert z rejemi 28. oktobra w Haslowje a na hodowny nyšpor 29. decembra w Róžeńće wjeselić.