Na lětušim hodownym nyšporu so kaž kóžde lěto při durjach pjenjezy za dobry skutk hromadźa. My mamy zbožo, zo mamy z našej spěwarku Christinu w pomocnym projekće angažowanu młodu žonu, kotraž cyle praktisce jako baba w Malawi žonam a dźěćom pomha. Nimo toho so wo to postara, zo ludźo wo projekće zhonja a předstawu wo tym dóstanu, na kotre wašnje so tu pomha. Tute dźěło chcemy z wašej pomocu rady podpěrać!

Tu wona wam projekt předstaji:

Šula

Malawi, mały kraj w južnej Africe a jedyn z 10 najchudšich krajow swěta ma někak 14,5 milionow wobydlerjow. Nimo problemow z wodu, milinu a hubjenemi žnjemi zda so najwječa starosć być wysoka ličba pacientow, kotřiž su na AIDS schorjeli. Z lěta 1984 dzěłaja 5 franciskanki z Němskej a Indonesiskej w małej wjesce Madisi, zo bychu hłód a nuzu ludźi znajmeńša kusk pomjeńšili a dźěćom nowu perspektiwu za žiwjenje dali.

Přez AIDS zhubichu mnohe dźeći staršeju a z tym móžnosć, šulu wopytać. Město toho so wo małke bratry a sotre staraja, dzěłaja na polu, zo bych k jědźi měli abo předałaja wšelakore jědźe na wikach, zo bychu sej mały fjenk za wšědne žiwjenje zasłužili. We wjeskach wokoło Madisi bydla někak 800 syrotow.

To pohnuwaše w lěće 2000 franciskanki, kotrež su hač dotal w misionskej chorowni w Madisi wjele dorosćenych na AIDS zemrěć widźeli, šulu za syrotow natwarić a jich z tym za žiwjenje – ale tež k temje HIV a AIDS kubłać. Tak nastawa katolska zakładna šula „St. Francis Catholic Primary School“. Po času natwarichu tež pěstowarnju ke kubłanju mjeńšich dźěći.

Prěni raz pobych po swojej matury w Madisi a spjelnjach tam dobrowolne socialne lěto zwonka domizny. Dźěłach hłownje w zakładnej šuli a wuwučowach w lětnikomaj 5a a 5b wšelakore předmjety.

Hišće dźensa so sotry přeco zaso přez pjenježne dary wjesela a tež wo nje proša, dokelž je jenož z našej pomocu móžno, zo je projekt dale žiwy. Tak su pjenjezy za najwšelakoriše materialije wšědneho dnja w šuli trjebane, ale tež za muku a zeleninu, zo by so dźěćom wšědny wobjed zmóžnił. Sotry pak so tež wo dalše kubłanje jich škitancow staraja a jich na přikład na srjedźne šule abo uniwerzity póšćelu. Košty za tute šule su jara wysoke (na přikład płaću lětnje za dwójnikow w 10.lětniku 270,-€ na wosobu za šulske pjenjezy a internat). Bohu žel šule płaćizny tež přeco zaso powyša, tak zo maja sotry stajnje wo jich darićelow wojować.
Franciskanki staraja so pak tež wo jich wobswět a pódlanske wjeski, hdźež ludźi ani čistu pitnu wodu nimaja. Přez pomoc darowanskeje akcije “Sportler gegen Hunger” natwarichu lětsa w třoch chudych wjeskach 5 jednore wodowy klumpy a zwjeselachu z tym mnoho ludźi…

Chorownja

Tež lětsa přebyłach w Malawi, tutón raz pak jako wukubłana baba w “St. Gabriel’s” chorowni w Namitete. Zeznach tam němskeho žónskeho lěkarja dr. Klausa Flohra a jeho žonu Catherine, kotraž je chorowna sotra, pochadźaca z Kenije. Wonaj dzěłataj a bydlitaj mjez tym hižo dwě lěće w Namitete a spytataj staciju za žonjace chorosće natwarić, na problemy a trěbne operacije skedźbnić, kaž tež w chorownej apoteki za transparentnym zastaranjom hladać.

Tež dr. Flohr mi před krótkim zaso pisaše, što je hišće wšitko trěbne a wažne za chorownju a za jeho dalše dźěło. Planuja porodnu žurlu přetwarić a seperatnu mału staciju za dočasa narodźene dźěći a chore ćěšenki natwarić, kaž tež seperatnu operacisku žurlu za wurězanje dzěsća (Kaiserschnitt). Tež wěste instrumenty a aparaty přeco hišće w Namitete faluja, zo by porod wěsćiši był a tež komplikowane pady dobru nadźiju na žiwjenje měli.

Tuž pomhajće mi tež lětsa zaso, z wašim hodownym pjenježnym darom ludźi w Malawi zwjeselić a projekty za dalše polěpšenje žiwjenja ludźi spěchować. Zikomo kwambiri – najwutrobniši dźak!

Christina Smolina