„Israelowa zrudoba a tróšt” je duchowny oratorij wuznamneho serbskeho komponista Korla Awgusta Kocora po słowach swjateho pisma. Při tym wupyta Kocor sam městna pismow stareho testamenta. Dokelž pak wón jenož małki dźěl orchestrowaše, je so komponist a dirigent Stefan Malzew z tym zaběrał. Mjez 1989 a 1990 nasta tak skutkowny oratorij, kiž na Kocorowej originalnej kompoziciji bazuje a so po zmysle hudźbneje tradicije kónc 19. lětstotka orchestrowaše, Po prapremjerje Malzoweho wobdźěłanja a dalšim předstajenjemi w lětomaj 1994 a 2019 smě so publikum nětko znowa na chłóšćenju pod hudźbnym nawodom Judith Kubicec wjeselić.