Oratorij „Nalěćo“ smy drje njedawno hakle spěwali, ale nochcemy skomdźić, na swój tradicionelny Lipjanski nalětni koncert do Kukowa prosyć. Wjeselimy so na zhromadne popołdnjo na klóšterskej zahrodźe w Pančicach-Kukowje. Naš chór „Lipa“ a Lipjanska dźěćina „Lipki“ witatej was njedźelu, 31. meje, 15:30 hodź z rjanymi, lóštnymi spěwami do najrjeńšeho počasa. Hižo wot 15:00 hodź prosymy na kofej a tykanc. A wězo smy sej tež lětsa zaso hosći na koncert přeprosyli: Błótowski žónski chór z Lubina, kotryž wustupi w błótowskej serbskej drasće.

Dajće sej lubić a budźće wutrobnje witani!

Chór Lipa spěwa wurězki z oratorija „Nalěćo“ (z přewodom klawěra) a spěwy wo lubosći a přećelstwje. Lipki přednjesu tři nowe nazwučowane spěwy z instrumentalnym přewodom a Błótowski žónski chór spěwa wjacehłósnje pěsnje, kotrež su so něhdy na přazy spěwali.

Koncert přewjedźe so w kooperaciji z Křesćansko-socialnym kubłanskim skutkom Sakska z.t.

Projekt spěchuje Załožba za serbski lud, kotraž dóstawa lětnje přiražki z dawkowych srědkow na zakładźe hospodarskich planow, kotrež su Němski zwjazkowy sejm, Krajny sejm Braniborskeje a Sakski krajny sejm wobzamknyli.