Nalětni koncert chóra Lipa, dnja 31. meje 2026, wotmě so znowa w klóšterskej bróžni – stracha dešća dla. Tónraz pak wosta na zbožo sucho, a hosćo móžachu so tež na ławki wonka zesydać a sej koncert lubić dać.

Najebać změny bě bróžnja hač na poslednje městno wobsadźena, z wjac hač 250 připosłucharjemi. Hosći běštej Błótowski žónski chór z Lubina – 13 spěwarkow, kotrež wustupichu w błótowskej serbskej drasće, a něhdźe 25 Lipkow.

Lipa pod wuměłskim nawodom Jadwigi Kaulfürstoweje zawjeseli publikum mjez druhim z medlejom z oratorija „Nalěćo“ Korle Awgusta Kocora. Solistki a solisća z chóra přeswědčichu přitomnych. Na klawěrje přewodźał je ćěleso Jan Brězan-Hejduška. Moderaciju stej Damian Dyrlich a Judith Pjetašec přewzałoj.

Lipki přednjesechu tři zabawne pěsnje wo Krabaće, nalětnich wjeselach a wo jězbje z ćahom bjez bileta. A Błótowski žónski chór pod nawodom Susann Herrmann spěwaše wjacehłósnje pěsnje, kotrež su so něhdy na přazy spěwali. Nimo toho zhoni publikum wo wšelakej Błótowskej serbskej drasće při wšelkich składnosćach. Zasadnje wšak wustupja spěwarki w swjedźenskej drasće, ale jedna spěwarka měješe drastu za přazu zdrasćenu, kotraž njeje cyle tak wosobna. – Koncertej přizamknje so dobra bjesada, wuchodźowanje po zahrodźe a na rozžohnowanje zaspěwa Lipa hosćom z Błótow. Spontan sydachu hišće někotre štučki znateho „Daj mi jedne jajko“ na dworje klóštra Marijina hwězda. Cyłkownje běše to zaso poradźeny koncert za wšěch wobdźělenych!